ភ្នំពេញ៖ វ៉ាក់សាំងបង្ការជំងឺកូវីដ-១៩ ប្រភេទ Astra Zeneca ចំនួន ៥២៣,១០០ដូស ដែលជាជំនួយរបស់រដ្ឋាភិបាល ហុងគ្រី បានដឹកមកដល់កម្ពុជា នាយប់ថ្ងៃទី១៥ ខែមីនា ឆ្នាំ២០២២ នឹងគ្រោងធ្វើពិធីទទួលជាផ្លូវការនាពេលខាងមុខ។

លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល បានមានប្រសាសន៍ថា វ៉ាក់សាំងបង្ការជំងឺកូវីដ-១៩ ប្រភេទ Astra Zeneca ចំនួន ៥២៣,១០០ដូស ត្រូវបានដឹកជញ្ជូនមកដល់កម្ពុជា នាវេលាម៉ោងប្រមាណ៧យប់ ថ្ងៃទី១៥ ខែមីនា ឆ្នាំ២០២២។

រដ្ឋលេខាធិការ ក្រសួងសុខាភិបាល បានបញ្ជាក់ថា កម្មវិធីប្រគល់ទទួលវ៉ាក់សាំងផ្លូវការ នឹង ធ្វើឡើងនៅព្រឹកថ្ងៃទី១៨ ខែមីនា ឆ្នាំ២០២២ នាវិមានសន្តិភាព ក្រោមអធិបតីភាពរបស់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ 

របាយការណ៍របស់ក្រសួងសុខាភិបាល បានឱ្យដឹងថា គិតត្រឹមថ្ងៃទី១៤ ខែមីនា ឆ្នាំ២០២២ ក្រសួងបានចាក់វ៉ាក់សាំងកូវីដ-១៩ ជូនប្រជាពលរដ្ឋសរុបប្រមាណ ១៦លាន នាក់ ស្មើនឹង៩២,២៣ភាគរយ៕

អត្ថបទ៖លាង ឡា