ការលើកឡើងរបស់លោកសាស្ត្រាចារ្យ  ព្រាប ចាន់ម៉ារ៉ា ព្រឹទ្ធបុរសរងមហាវិទ្យាល័យបុរាណវិទ្យានៃសាកលវិទ្យាល័យភូមិន្ទវិចិត្រសិល្បៈ បានធ្វើឡើងតាមរយៈហ្វេសបុកផ្ទាល់ខ្លួន និងបន្ទាប់ពីមានព័ត៌មានថា ចេតិយដែលមានអាយុកាលជាង១២០ឆ្នាំនៅវត្តបទុមវតីត្រូវបានវាយកម្ទេច។ លោកសរសេរថា ចេតិយវត្តបទុមវតី ស្ថិតស្ថេរនៅតាំងពីវិហារចាស់តមកវិហារថ្មី ឆ្លងកាត់៨រាជ្យស្តេចផែនដី គឺព្រះករុណាព្រះបាទសម្តេច ១. ព្រះនរោត្តម- ២.ព្រះស៊ីសុវត្ថិ- ៣.ព្រះមុនីវង្ស- ៤. ព្រះសីហនុ (លើកទី១)- ៥. ព្រះសុរាម្រឹត- ៦. ព្រះកុសុម: ៧. ព្រះសីហនុ (លើកទី២) ៨. ព្រះបរមនាថ និងមេដឹកនាំច្រើនជំនាន់ទៀត។ អ្វីដែលសំខាន់ ទៀតនោះ គឺចេតិយមានរចនាតុបតែងវិចិត្របិទក្បាច់ ផ្កាចាន (កុលាលភាជន៍) សាងដោយក្រុមអ្នក ឧកញ៉ាអនុរក្ខធានិន្ទ បែន​ និងអ្នកឧកញ៉ារាជានុភាព ឌុច នៅថ្ងៃសៅរ៍ ១កើត ខែចេត្រ ឆ្នាំជូត ឯកស័ក ព.ស.២៤៤៣, ម.ស.១៨២២, ច.ស.១២៦២ (គ.ស.១៩០០) អាយុកាល១២៣ឆ្នាំ ហើយជាប្រភេទចេតិយ ដែលនៅមានដោយកម្រ សម្រាប់ទុកជាភស្តុតាង និងឲ្យគេសិក្សារៀនសូត្រពីរចនាបថស្ថាបត្យកម្មក្នុងវត្តអារាមខ្មែរ។

គួររំលឹកថា ចេតិយបុរាណដែលមានអាយុកាល១២៣ឆ្នាំហើយជាប្រភេទចេតិយដែលនៅមានដោយកម្រស្ថិតក្នុងវត្តបទុមវតី ក្រុងភ្នំពេញ  ត្រូវបាន​ក្រុមជាងវាយបំផ្លាញចោលដោយសារ​តែច្រឡំនេះបើតាមសម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក។ ព្រះអង្គបានមានបន្ទូលប្រាប់សារព័ត៌មាន ថា ការវាយនោះដោយសារតែការស្ដាប់ច្រឡំពីភិក្ខុសង្ឃដែលដឹកនាំជួលជុល ។ ព្រះអង្គបន្តថា ដំបូងឡើយព្រះសង្ឃដែលជាគណៈគ្រប់គ្រងវត្តបានប្រាប់ឱ្យដឹកនាំជាងទៅជួសជុល និងរៀបចំឥដ្ឋកន្សែងនៅទីតាំងជាប់ចេតិយបុរាណនោះឱ្យបានស្អាតប៉ុន្តែភិក្ខុសង្ឃ ដែលដឹកនាំស្ដាប់មិនច្បាស់បែរជាប្រាប់ជាងឱ្យវាយចេតិយបុរាណនោះទៅវិញ។ ទាក់ទងករណីនេះនាថ្ងៃទី០២ ខែមករា ឆ្នាំ២០២៣ ខាងក្រសួងវប្បធម៌ និងវិចិត្រសិល្បៈបានចុះមកត្រួតពិនិត្យនិងបញ្ជាឱ្យខាងវត្តផ្អាកការជួសជុលដើម្បីឱ្យក្រសួងវប្បធម៌ស្រាវជ្រាវ និងជួសជុលដើម្បីរក្សាភាពដើមនៃចេតិយឡើងវិញ។

លោក អ៊ុក សុខា អគ្គនាយកបេតិកភណ្ឌនៃក្រសួងវប្បធ៌ម និងវិចិត្រសិល្បៈបានឱ្យដឹងថា ក្នុងករណីនេះបានឯកភាពមិនបន្តវាយកម្ទេចទៀតទេ និងត្រូវធ្វើការជួលជុលឡើងវិញហើយក្រសួងបានចាត់ឲ្យអ្នកជំនាញពិនិត្យនិងធ្វើរបាយការណ៍ជូនថ្នាក់ដឹកនាំ។ សូមបញ្ជាក់ថា សំណង់ចេតិយអាយុ១២៣ឆ្នាំនេះក្រសួងធ្លាប់បានចុះក្នុងបញ្ជីបេតិកភណ្ឌរួមហើយ។ ទន្ទឹមនេះក្រសួងនឹងមាននិតិវិធីច្បាប់ទាក់ទងនឹងករណីវាយកម្ទេចសំណងនេះ៕