ភ្នំពេញ៖ បុរសជនជាតិចិនម្នាក់ ត្រូវបានសមត្ថកិច្ចតាមស្រាវជ្រាវចាប់ខ្លួន កាលពីយប់ថ្ងៃទី៧ ខែមិនា ឆ្នាំ២០២២ នៅក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ពាក់ព័ន្ឋករណីឃាតកម្មលើស្ត្រីជនជាតិចិនម្នាក់ នៅសង្កាត់លេខ៤ ក្រុងព្រះសីហនុ ខេត្តព្រះសីហនុ។
សមត្ថកិច្ចបានឱ្យដឹងថា បុរសជនជាតិចិន ដែលបានឃាត់ខ្លួនមានឈ្មោះ LI XIAO JIANG អាយុ៣១ឆ្នាំ កាន់លិខិតឆ្លងដែនលេខ EG 9171185 និងបានដកហូតអាវុធខ្លី មួយដើម ម៉ាក BERETTA (ប្រើហ្គាស), ប្រាក់ដុល្លារ ១ដុំ (លុយសែន) និងទូរស័ព្ទ ១គ្រឿង។
សូមបញ្ជាក់ថា កាលពីវេលាម៉ោង ១:០០នាទីរសៀល ថ្ងៃទី២៨ ខែកុម្ភៈ ឆ្នាំ២០២២ មានករណីឃាតកម្មមួយបានកើតឡើង ស្ថិតនៅក្នុងបន្ទប់ជួលមួយកន្លែង ស្ថិតតាមបណ្តោយផ្លូវលេខ១០២ ក្រុម២ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ បង្កឱ្យមានការភ្ញាក់ផ្អើលដល់កម្លាំងសមត្ថកិច្ច ឈានដល់បើកការស្រាវជ្រាវតែម្ដង។
ចំណែកជនរងគ្រោះមានឈ្មោះ LOU ZHIJIN ភេទស្រី អាយុ៤២ឆ្នាំ ជនជាតិចិន កាន់លិខិតឆ្លងដែនលេខ E 88842731 ត្រូវបានជនដៃដល់យកខ្សែចងដៃ ចងជើង និងច្របាច់បំពង់ក រហូតដល់ស្លាប់នៅនឹងកន្លែង។
បច្ចុប្បន្ន ជនដៃដល់ត្រូវបាននគរបាលព្រហ្មទណ្ឌក្រសួងមហាផ្ទៃ ប្រគល់ឱ្យស្នងការដ្ឋាននគរបាលខេត្តព្រះសីហនុ ដើម្បីកសាងសំណុំរឿងចាត់ការបន្ដតាមនីតិវិធី៕
