ភ្នំពេញ៖ នៅក្នុងពិធីទទួលវ៉ាក់សាំង Pfizer ជំនួយរបស់រដ្ឋាភិបាលអូស្រ្តាលីជាង ២.៣លានដូស នាយប់ថ្ងៃអាទិត្យ ថ្ងៃទី២៦ ខែធ្នូ ឆ្នាំ២០២១ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានដាស់តឿនឱ្យបន្តការប្រុងប្រយ័ត្នដោយត្រូវអនុវត្តតាមវិធានការសុខាភិបាល។ 

សម្តេចតេជោ បានថ្លែងថា ចាប់តាំងពីផ្ទុះជំងឺកូវីដ-១៩ រាជរដ្ឋាភិបាលកម្ពុជាបានកំណត់យ៉ាងច្បាស់ថា មានតែវ៉ាក់សាំងទេទើបអាចយកឈ្នះជំងឺនេះបាន។ សម្តេចតេជោបានបន្តថា ទោះបីជាពិភពលោកកំពុងមានវត្តមានមេរោគកូវីដ-១៩ បំប្លែងថ្មី «អូមីក្រុង» ក៏កម្ពុជា មិនមានការបារម្ភដែរ។ 

សម្តេចនាយករដ្ឋមន្ត្រីកម្ពុជា បានមានប្រសាសន៍បញ្ជាក់ថា កម្ពុជា រកឃើញវិជ្ជមានជំងឺកូវីដ-១៩ ចំនួន១៥ករណី ដែល១៥ករណីនេះ ជាករណីនាំចូល ហើយសុទ្ធសឹងតែជាមេរោគបំប្លែងថ្មី «អូមីក្រុង» ។ សម្តេចតេជោ បានអំពាវនាវដល់ប្រជាពលរដ្ឋកុំមានការភិតភ័យជាមួយមេរោគបំប្លែងថ្មីអូមីក្រុង ប៉ុន្តែត្រូវបន្តប្រុងប្រយ័ត្នដោយអនុវត្តវិធានការសុខាភិបាលឲ្យបានខ្ជាប់ខ្ជួនជានិច្ច។

កម្ពុជា បានរកឃើញករណីវិជ្ជមានមេរោគបំប្លែងខ្លួនថ្មីប្រភេទ«អូមីក្រុង»កាលពីថ្ងៃទី១៤ ធ្នូ ឆ្នាំ២០២១ លើស្ត្រីជនជាតិខ្មែរមួយរូប ជាអ្នកធ្វើដំណើរតាមជើងហោះហើរចេញពីប្រទេសហ្គាណា តំបន់អាហ្វ្រិកខាងលិច ដោយឆ្លងកាត់តាមទីក្រុងឌូបៃ រួចបន្តដំណើរតាមជើងហោះហើរមកប្រទេសថៃ ទើបបន្តដំណើរមកដល់ប្រទេសកម្ពុជានៅថ្ងៃទី១២ ធ្នូ ឆ្នាំ២០២១។ 

មកទល់ពេលនេះ រាជរដ្ឋាភិបាលកម្ពុជា កំពុងពិចារណាក្នុងការចាក់វ៉ាក់សាំងដូសទី៤ ដល់មន្រ្តីជួរមុខ ដើម្បីបង្កើនភាពសុំាំដល់រាងកាយផងដែរ៕

អត្ថបទ​​ លាង​ ឡា